السلام عليكم
زمان لما كنا اطفال(مش من زمان اوي يعني)كان فيه سؤال من الضيوف دائما ما يأتي بعد عاملين ايه ياحبايبي وبتسمعوا كلام ماما ولا لأ؟وشاطرين في المدرسه،هو ها نفسكم لما تكبروا إن شاء الله تبقوا إيه؟
كانت الاجابه تقريبا موحده :
في البنات اما طبيبه او مدرسه
في الاولاد اما ضابط او مهندس او طيار(وهو الاغلبيه).
في ايام حرب اكتوبر،كنت في اوائل دخولي للمدرسه،بالطبع كلنا قبل الحرب كنا لاندري اي شئ عن ما هي الحرب ، حتي فاجأتنا جميعا باصوات الطائرات والفرحه الغامره علي وجوه اهلنا والاحضان والقبلات والدموع التي غمرونا بها،وقتها فهمنا قد ايه مهم جدا نكون احراراو حتي نعرف ندافع عن وطنا،بالطبع فهم الكلمه كان سطحي جدا وهو قتل العدو (!) مش لازم الطريقه و لكن المهم النهايه .
بالطبع امتنعنا جميعا عن الذهاب الي المدرسه لمده لا اذكرها ولكن عند العوده كلنا بلا استثناء كنا عايزين نطلع ضباط (اولاد وبنات! )لانهم هم من اعطونا هذا الاحساس الخفي الجديد بالفرحه .
معلهش طولت عليكم لكن علشان ابدا في اعطائكم فكره عن الوضع الحالي .
في عيادتي - والافضل في اوائل شغلي – اعتدت ان اتحبب للاطفال وان اسألهم ها ياحبايبي عايزين تبقوا ايه لما تكبروا ؟
سأسرد لكم بعض ما سمعت وبالطبع اجاباتي عنها:
انا ابغي اصير سوبر مان!!!!!!!!!!
ياحبيبي ده صفه مش عمل(ينقلب وجهه علي)انا اقول ابغي اصير سوبرمان ، عندها اضحك واسكت .
انا عايز ابقي سبيدرمان!!!!!
ياحبيبي ده حشره!!!!!!!!(يبدأ في البكاء لانني شتمته)والله حشره (اليس العنكبوت من الحشرات ؟) طيب يمكن انت عايز تنقذ الناس من الشر ، يعني يمكن نفسك تبقي ضابط بوليس؟ لأ اقولك عايز ابقي سبيدرمان واطير!!!!!!!!!! طيب طيار ؟لأ سبيدرمان!!!!!!
انا عايز ابقي توم وجيري!!!!!!
الأتنين!!! ؟؟؟ ياحبيبي لازم تختار!!!!!!!!!!!!!!
وغيره وغيره من الاسد الملك الي كينج كونج وهكذا وكلها من اصدقائنا الحيوانات.
انتهي في بالي السؤال تماما بعد فتره قصيره وتجربه مفيده جدا
بالطبع هناك من قال لي ابغي اصير دكتور واعطي ابر للناس علشان اوجعهم(!)تغاضيت انا بالطبع عن الجزء الاخير حتي لا اوصمه بالساديه الغير مبرره في سنه (او بالاحري تغاضيت حتي لا افهم انه يقصدني انا بهذا الكلام!!!!!!).
فين الامل في ان اصبح شئ معين؟هل العيب فيهم ام فينا؟هل هو التليفزيون المفتوح 24 ساعه علي سبيس تون و كرتون نت ؟!؟
هل هو عدم وجود اصلا المثل الاعلي لاي منهم امامه حتي نسأله عنه؟
لم يكن في عائلتي اي طبيب يمكن ان اتمني ان اصبح مثله،ولكن اذكر اني قد اجريت الكشف علي جميع كراسي وكنب البيت والسفره وغيره وانا في سن صغير جدا لانني احببت صفه الطبيب سواء في ما اراه في تليفزيون بلدي او في طبيبي الذي عالجني وانا صغيره علي مااتذكر كانت هناك صوره طيبه للعمل وصوره واضحه له لدينا ، حاليا علي ما اري لا يوجد غير الحرامي في مسلسلاتنا و هذا الحرامي هي الصفه الاولي التي تعلو علي وظيفته اي انه مثلا طبيب وحرامي ، مهندس وحرامي،محامي وحرامي(!) و غاب المثل الاعلي .
ايها الاهل :احرصوا علي وجود مثل اعلي ،احرصوا علي تسريب معلومات حتي ولو وهميه امام ابنائكم بطريقه غير مباشره عن مثل اعلي ولا يجب ان نحصرهم فيما نحن نريد بل أعطوا خيالهم فرصه للعمل لا تجعلوا كل مايروه من حيوانات هو المثل الاعلي لاننا بالفعل نريد لجيلهم ان يسترد لنا الكثير مما ضاع منا ابدأوا في الجلوس معهم وسرد بعض قصص الانبياء والصحابه وغيرهم
اسردوا لهم قصص من التراث
اشعلوا خيالهم بقصص صادقه لتحتل ما يفعل بهم حاليا
الخلاصه اعطوهم اكثر من وقتكم ،لانهم هم استثماركم الحقيقي.
وإلي لقاء
